Монгол улсын Засгийн газар, Соёлын яамнаас улсын хэмжээнд хэрэгжүүлсэн “Соёлын сэргэлт-2023” аян өнөөдөр Төв аймагт хаалтаа хийж байна. Аяны хүрээнд Чингис хаан Үндэсний музей, Төв аймгийн Соёл урлагийн газар, “Монгол туургатан театр” хамтран 27 сумын хүүхэд багачууд, залуучууд, иргэдэд зориулан соён гэгээрлийн лекц, урлагийн тоглолт, нүүдлийн түр үзэсгэлэн, мэргэжил арга зүйн сургалт, музейн боловсролын хөтөлбөр, сумын соёлын хүртээмж, тулгамдсан асуудлын талаар санал, асуулга авах зэрэг олон талт үйл ажиллагааг амжилттай зохион байгуулсан байна. Төв аймгийн Засаг дарга Д.Мөнхбаатар аяны хаалтын арга хэмжээний үеэр хэлсэн үгэндээ: “Төв аймгийн ИТХ, ЗДТГ-аас хөгжлийн бодлогоо тодорхойлж, уламжлалт хэв шинжит байдал болон шинэлэг зүйлийг хослуулсан олон төсөл, хөтөлбөрүүдийг эхлүүлээд байна. Үүний дотроос Монгол улсын Соёлын яамтай хамтран хэрэгжүүлж байгаа “Үндэсний археологи, угсаатны зүйн музей, лаборатори”-ийг онцлоод , уг томоохон бүтээн байгуулалтын ажил эрчимтэй явагдаж байгаа дурдлаа. Түүнчлэн “Соёл урлагийн салбарыг 2021-2024 онд хөгжүүлэх стратеги төлөвлөгөө”-ний хүрээнд хийгдсэн томоохон хөрөнгө оруулалтын ажлуудын талаар мэдээлэл хүргээд Төв аймгийн хувьд цаашид Соёлын яамтай хамтран ажиллаж, соёлын бүтээлч үйлдвэрлэлийг хөгжүүлэх, томоохон уран бүтээл туурвих, соёлын өвийн томоохон орон зай бий болгохыг зорин ажиллах болно” гэлээ. “Соёлын сэргэлт-2023” аян нь Соёл урлагийн талаар баримтлах бодлого, үйл ажиллагааг олон нийтэд сурталчлах, салбарын мэргэжилтнүүдийг чадавхжуулах , соёл урлагийн салбарын нэр хүндийг дээшлүүлж, гүйцэтгэх үүрэг, байр суурийг тодорхойлох, соёлын өвийн хадгалалт хамгаалалтыг шийдвэрлэх, орон нутаг бүр өөрийн онцлогт тулгуурласан соёлын бүтээлч үйлдвэрлэлийг хөгжүүлэх боломжийг эрэлхийлсэн үр дүнтэй, ажил хэрэгч аян болж өндөрлөлөө.

2023-09-14 10:00:00