Төв аймаг байгуулагдсаны түүхт 100 жилийн ойг тохиолдуулан “Зуунмод нийтийн тээвэр” төслийг хэрэгжүүлж, “Улаанбаатар Смарт карт” ХХК-тай хамтран "U money" цахим картын үйлчилгээг өнөөдрөөс нийтийн тээврийн үйлчилгээнд нэвтрүүлж байна. Уг арга хэмжээнд аймгийн Засаг дарга Д.Мөнхбаатар, Засаг даргын орлогч Г.Сурмаа, ХОХБТХ-ийн дарга Д.Саран-Эрдэнэ, Зуунмод хотын захирагч Ч.Сарангэрэл, Автотээврийн төвийн дарга Н.Аасүрэн, “Улаанбаатар смарт карт” ХК-ний ТУЗ-ийн дарга Б.Мөнхболор, Ерөнхий захирал Шин Дун Ү болон бусад албаны төлөөлөл, иргэд оролцлоо. “Улаанбаатар Смарт Карт” ХХК нь 2014 онд үүсгэн байгуулагдаж, Улаанбаатар хоттой мастер гэрээ байгуулан Нийслэлийн нийтийн тээврийн үйлчилгээнд “Удирдлага мэдээллийн болон цахим төлбөрийн систем”-ийг нэвтрүүлсэн бөгөөд ингэснээр Улаанбаатар хот болон Зуунмод сумын иргэд нийтийн тээвэрт нэг системээр буюу 1 картаар зорчих боломжтой болж байна. Төв аймгийн нийтийн тээврийн үйлчилгээнд дөрвөн автобус, 4 чиглэлд зорчиж, өдөрт 28 рейс гүйцэтгэх юм. "U money" цахим картыг 1 дүгээр баг Манзушир өргөө хороолол “Ихэр заяа” дэлгүүр, 2 дугаар баг Ланс II буудал “Таван эрдэнэ” дэлгүүр, 3 дугаар баг Баянхошуу “Ивээл” маркет, 4 дүгээр баг Зүүндэлгэр “Өрнөх” дэлгүүр, 6 дугаар баг Энхтайван “Замт” дэлгүүр гэсэн таван байршилд цэнэглэж, худалдаалах аж.