Өнөөдөр буюу 06 дугаар сарын 14-ны билэгт сайн өдөр аймаг, орон нутгийнхаа Эгэлгүй баатар-эрхэм донорууддаа хүндэтгэл үзүүлж, “АМЬДРАЛ БЭЛЭГЛЭСЭН 20 ЖИЛ-ЦУСНЫ ДОНОР ТАНД БАЯРЛАЛАА” уриан дор Цусны донорын дэлхийн өдрийг тэмдэглэн өнгөрүүллээ. Энэ жилийн хувьд 20 жилийн ойгоо тодотгохоос гадна, донорыг алдаршуулан, тэдний бэлэглэсэн цус олон сая үйлчлүүлэгчдэд амьдрал бэлэглэж байгааг онцлохыг зорьжээ.

Аймгийн Цусны салбар төв нь жилд 400-450 нэгж бүхэл цус цуглуулж, 850-880 орчим нэгж 7 нэр төрлийн цус цусан бүтээгдэхүүн үйлдвэрлэн, аймгийн Нэгдсэн эмнэлэг, 27 сумын эрүүл мэндийн төвүүдийг аюулгүй, найдвартай цус цусан бүтээгдэхүүнээр ханган ажилладаг. Аймгийн хэмжээнд 582 донор байдгаас 80 нь хүндэт донор юм. Тэдгээрээс “Шударга журам” медальтай донор 1, 100 буюу түүнээс дээш удаа цусаа бэлэглэсэн “Мөнгөн донор” 1, 70 буюу түүнээс дээш удаа цусаа бэлэглэсэн “Хүрэл донор” 3 хүн байна. Энэ жил 35 ба түүнээс удаа цусаа бэлэглэсэн 4 донор шинээр “Хүндэт донор”-ын болзол хангаж, энэ өдөр үнэмлэх, энгэрийн тэмдгээ гардан авлаа. Донор-Таны өгсөн цус нь цус сэлбүүлэх шаардлагатай өвчтөнүүдийн амь насыг аварч, тэдний амьдралын гол баталгаа болохын зэрэгцээ эх барих эмэгтэйчүүд, мэс засал, байгалийн гамшиг, осол гэмтлийн үед зайлшгүй шаардлагатай цус, цусан бүтээгдэхүүний хэрэгцээг хангахад чухал ач холбогдолтой байдаг. Дэлхийн олон улс орны цусны албуудад аюулгүй, чанарын шаардлага хангасан цус, цусан бүтээгдэхүүнийг хүртээмжтэйгээр нийлүүлэх нь тулгамдсан гол асуудал хэвээр байна. Иймд сайн дурын, авлагагүй цусны болон сийвэнгийн доноруудын хандив чухал байсаар байна. Сайн дураараа, авлагагүйгээр өгсөн сийвэнгийн бүтээгдэхүүн нь дархлал хомсдол, гемофили зэрэг өвчнөөр оношлогдсон хүмүүсийн амьдралын чанарыг дэмжих эмчилгээнд хэрэглэгдэж байна. Ард иргэдийн эрүүл мэнд, амьдралын чанарыг дээшлүүлэхэд хувь нэмрээ оруулсан сайн дурын авлагагүй ачтан Донор танд талархал илэрхийлье.