Төв аймаг “Хөдөө аж ахуй, үйлдвэрлэлийн стратеги төлөвлөлт”-ийн хүрээнд “Шейр Монгол” ТББ, бусад хөрөнгө оруулагч байгууллагуудтай хамтран мал аж ахуйн салбарт механикжуулалтыг нэвтрүүлж, малчдын цаг хугацаа их зарцуулдаг ажил болох хонь ноослох үйл явцыг хөнгөвчлөх зорилгоор “Хонь ноослох явуулын үйлчилгээ”-г нэвтрүүлж, сумдад амжилттай хэрэгжүүлж байгаа билээ. Өнөөдөр Баянчандмань суманд дээрх хөдөө аж ахуйн инновацлаг тоног төхөөрөмж, технологиудыг танилцуулах нээлттэй өдөрлөгийг зохион байгуулж, хонь хяргах цахилгаан хайч, хонь угаах болон хяргасан ноосонд анхан шатны ангилалт хийх төхөөрөмж цахилгаан хашаа зэрэг хөдөө аж ахуйн шинэлэг тоног төхөөрөмжүүдийг танилцуулж байна. Хонь ноослох, ангилах, ээмэглэх, угаах, ариутгах үйл явц нь малчдын хөдөлмөрийг маш их хөнгөвчилж байгаа нь уг тоног төхөөрөмжийн онцлог, давуу тал юм. Хонь ноослох “Явуулын баг” нэг өдөрт 1000 хонь ноосолж, угаадаг байна.