БУТАНЫ ВАНТ УЛСЫН ДОТООД ХЭРЭГ, СОЁЛЫН ЯАМНЫ ТӨЛӨӨЛӨГЧИД МАНАЙ АЙМАГТ ЗОЧИЛЖ БАЙНА

Монгол улсын сайд, Засгийн газрын Хэрэг эрхлэх газрын дарга Л.Оюун-Эрдэнийн урилгаар Монгол улсад айлчилж байгаа Бутаны Вант улсын Дотоод хэрэг, соёлын сайд Дашо Шеруб Гелтшэн /Sherub Gyeltshen/ тэргүүтэй төлөөлөгчид, ЗГХЭГ-ын дэд дарга У.Бямбасүрэн, ОНУЗГазрын дарга Т.Зоригтбаатар нар өнөөдөр манай аймагт хүрэлцэн ирлээ. Төлөөлөгчдийг Засаг дарга Ж.Батжаргал тэргүүтэй аймгийн удирдлагууд хүлээн авч, уулзсан юм. Бутаны Вант улсын төлөөлөгчдийн хувьд манай улсад айлчлах үеэрээ орон нутгийн засаглалыг бэхжүүлэх, төвлөрлийг сааруулах бодлогын хүрээнд хийгдсэн ажлын туршлага, гарсан ололт, амжилттай танилцаж, туршлага судлахаар ирсэн гэдгээ илэрхийлсэн. Энэ хүрээндээ аймгийн Төрийн үйлчилгээний Нэгдсэн төвийн үйл ажиллагаатай танилцлаа.